Hautsak errautsa bezain
Itxaro Borda

Maiatz, Elebi 6, 2002ko azaroa

 

Ibaia, lerden eta gordin,

        Galerietako zubipean

Burbuilan behera doala,

        Zergatik orduan

Jendetasuna zor ­eta, destinoa

Ekidinez, destinoa (a)ments?

        Xuxurlatzen dizu

Rainer Maria Rilkeren hitzak

Ezpainetan darizkiola.

 

Li Bai negarrez urtzen doa

Kolegioko zubiaren maldan

        Hizkuntzez eta lurrez

Munduan bakun naizenez

Balizko etsai zaitut eta haurride

Nahi baldin banauzu

Nire ezaugarriak derrigorrez

Onartuko dituzu

        Oihukatzen

Entzuten duen oroz.

 

Abiapuntua aldatuz dio:

        Bestea da munduan bakuna

Eta hizkuntzez eta lurrez

Menturazko etsai harengana jotzea da zure

Buruaren salbatzeko

        Dolorezko ibai soila.

 

Bestea. Bestela. Bestaldean.

        Hauts errautsaren

        Deklinabidearen destinoa.

 

 

Hautsak errautsa bezain
Itxaro Borda

Maiatz, Elebi 6, 2002ko azaroa