Hautsak errautsa bezain
Itxaro Borda
Maiatz, Elebi 6, 2002ko azaroa

Uraren plisti-plastak hegietan ozen

Aditzen direnean

Dakizkizun hizkuntza guztiak

        Arrotz

Dabilkizu ezpainetan,

Zeurea barne:

Zergatik dauzkazu eleak, aditzak

Deklinabideak eta osagarri gramatikalak

Heldua zaren lurruts honetan

Nehor ez baldin baduzu

        Gurutzatzen?

Hautsak errautsa bezain

        Maite duzula

Xuxurlatzeko?

Amodioa iragar ezina da.

        Dio:

Ez duzu bestea atzemanen,

Oroz bat bestea

Baldin bazara zu.

        Eransten dizu:

Identitate eskatuaren arropa zarpailak

Eta garaiz urrundu amaren bularraren

Oroitzapenaren pare moldatu zein landu duzun

Hizkuntzaren eraikuntza murrizleak

        Erre itzazu.

Hautsak errautsa bezain
Itxaro Borda
Maiatz, Elebi 6, 2002ko azaroa