Hautsak errautsa bezain
Itxaro Borda
Maiatz, Elebi 6, 2002ko azaroa

        Mintzo zaizun

Ahotsaren ozenaz nahasten zaitu:

        Behartuko zaituzte

Etxeko gutxietsien hilotz ketsuaren

Gainera laido eta tu egitera,

Beraienetarik zarela

Frogatzearren;

        Behartuko zaituzte

Balizko etsaien aitzinean

Gerlako orroak txanpatzera,

Beraienetarik zarela

Frogatzearren.

Batak zein besteak

Erantzunaz axola gabe,

Amore emate

        Osoa

Manatuko dizute.

Jakizu, dio, ibaiak ezponda bietako

Ur belar ilunak eztiro balakatuz

Eta ukamen alderdikoiak saihestuz

Itsasorainoko bidea daroala.

        Nik zu zaitut maiteago

Ilargiak gaua baino

        Diozu laztan-aire,

Malkoz leher zorian.

Hautsak errautsa bezain
Itxaro Borda
Maiatz, Elebi 6, 2002ko azaroa