EGUNEKO BERRIAK (I)

La Voz de Navarra, 1932-IV-26

        Euzko-araudia

        Ez al zaizu politago estatuto baskoa baño? Or duzu, ba, onetsirik. Atzo bildu ziren Gasteizen araudi au egiteko zera zuten oñordekoak ta azkenik onartu dute ao batez. Poztu gaiten, beraz, euzkotarrak. Bañan berri onak ez ditugu onekin aitu Badakizu, irakurlea, nola udalak edo ayundamenduak bildu bear direan araudia onartzeko. Biltzar au egin bear zen Euskalerriko erri batean. Orra ba, erri au Iruña izanen da. Au dala-ta, eldu den illek 22gnean Iruñara etorriko dira Euskalerriko udal guziak ta egun oroigarri ontan Euzkadik, udalen aoz, onartuko du.

        Itxas-ontzi bat ondora

        Euzko-ontzi bat ondoratu da Inglaterrako itxasotan. Amar gizon il omen dira. Ontzi onen izena Ulia-mendi. Arraintzakoa zen ontzi au ta Pasaiatik ateratua azken ostiralean. Beste ontzi batekin ateratua zen Pasaiatik arrainketan. Parean ari ziren biak arraintzan eta elkarren aldamenean zeuden. Bat batez, Jaizkibel-mendi oartu zen ezagola bestia. Asi zen ala oartu ea bila zezakean. Alperrik. Beste ontziak ezuen deusik erantzuten. Bazterrak arakatu edo miatu zituen ezin idorota. Ezinbertzean joan zen. Orduko artan iragaten zen ontzi ingles bat, ito-urranen oiu ta garraziak entzunik. Urbildu zen toki artara. Bi gizon besterik ezin altxatu zituen. Eta Cardiffera eraman zituen. Ontziaren jabeak baieztu dute berri negargarri au, esanez bi gizon bakarrik alxatu al izan direla, bestien berririk ez dela.