AMALAUGARREN DOTRIÑA

Jaungoiko gure Jaunak Abran Patriarkarekin
egin zuen alianza edo alkar artze bat
guztiz solemnea, etc.

        Gaur esan bear dizuet, N.K., Eskritura Santuaren historiari narraiola; nola gure Jaungoikoak Abran Patriarkarekin egin zuen alianza edo alkar artze bat guztiz solemnea: eta nolakoak izan ziran Abran bera, eta aren ondorengoak, eta batez ere Isak, Jakob, eta oben semeak, amabi Patriarkak: eta aen artean nola distingitu zan Jose kastoa, Ejitoko erreinuan Israeldarrak sartu ziran bitartean. Exenplo, eta dotriña andiko gertaerak aditu bear dituzue: atenzioa eskatzen dizuet.

        G. Gure Jaungoikoak Abranek agertu zuen fede, edo sinismenari zer sari eman zion, aren mandamentu, edo aginteari obeditzeagatik bere erria, edo bizilekua utzi zuenean? E. Gizon Santu arekin egin zuen alianza edo konbenio solemne bat, au da tratu edo alkar artze bat guztiz miragarria. Bada Jaungoikoak egin ziozkan eskinte, edo promesa solemne, eta guztiz andi batzuek, Jaungoikoaren aldetik absolotuak, eta graziazkoak.

        G. Zer eskeñi, edo ofrezitu zion bada? E. 1. Bera izango zala aren Jaungoiko, eta beraren, eta bere ondorengoen protektore, edo lagunzalle: 2. Pueblo edo jenerazio guztiz andi baten aita egingo zuela: 3. Lur guztiz aberats, eta ugari bat emango ziela, au da Kanango bazterrak, promisioko lurra, berari eta bere ondorengoai: eta 4. eren jatorritik jaioko zala Mesiasa, edo munduko Salbadorea. Eta azkeneko au da ezkeinte guzien artean andiena, eta miragarriena: gure Salbadore Jesu-Kristoren etorrera aiñ anzinatik, eta aiñ klaru seguratzen zuena.

        G. Eta alianza, edo alkar artze, edo tratu orren kanpoko, edo ageri zan señalerik Jaungoikoak eman bazuen? E. Bai: bada juramentu egiñaz agindu zuen Jaungoikoak promesa, edo oskeinte oriek kunplitzea: eta orduan disponitu zuen Zirkunzisioa; Abran, eta bere ondorengoak distingitu, edo berezi bear zituan señale, edo marka bezela munduko beste pueblo, edo jende mota guziokgandik: eta Zirkunzisioa zan gorputzaren alde minbera batetik aragi zatitxo bat gañibetaz kentzea: Juduak orain ere gordetzen duena, baña Kristauak ez; zerren Jesu-Kristo gure Jaunak aren ordez Bautismoko Sakramentua eman zigun: eta Zirkunzisio ura Bautismoaren figura, edo itzal bat zan; eta egia agertu ezkero figura bearrik ezta: bada gorputzaren Zirkunzisioak aditzera ematen zuen biotzaren Zirkunzisioa, au da aragiaren deseo, edo griña gaiztoak menderaturik, edo ezirik, Jesu-Kristogan gizon berriak izatea: aren espirituaz batera bizi izatea: eta ori da Bautismo Santuan agintzen deguna: eta Kristau guziok egin bear deguna.

        G. Zer bizimodu egiten zuen Kanango bazterretan Abran Santuak, eta bere familiak, eta Lot bere illobak? E. Arzaiak ziran, eta artalde, eta ondasun andiaren jabeak; eta eren mendean mirabe, eta serbitzari asko zituen: eta osabak, eta illobak alkar txit ondo artzen bazuen ere, aen mendeko arzaiak alkarrekin ondo etzetozen: diferenziak, eta disputak sortu zituen. Abrani kontu eman zioten, eta onek Lot bere illobari esan zion: alkarren aide gertuak gera: pakean bizi bear degu: eta aserratzeko okasioak, edo gaiak kendu bear ditugu. Gauden tokian ezin guziok ondo izan gaitezke, eta ala aukera ematen dizuet: zere artaldearekin ezker aldera joan nai badezu, ni eskui aldera joango naiz, eta zu eskuira bazoaz, ni ezkerrera joango naiz. Gertuan zegoan Sodomako erri guztiz ederra, eta alde ura autu zuen Lotek: baña ondo begiratu bage, nolako arrisku, edo peligroetan bere burua ipintzen zuan: bada erri artan, eta inguruetan munduan ziran gizonik gaiztoenak bizi ziran: aen kastigo izugarriak gero erakutsi zuen bezela.

        G. Eta zer beste gauzarik gertatu zitzaion Abran Santuari Lot bere illobarekin? E. Sodomako Erregeak, eta inguruetako beste lau Erregek gerra bat izan zuen alde aetako beste lau Erregekin: lau oek garaia, edo bitoria irabazi zuen, eta Sodomako erriaz jabetu ziran: eta an ziranak eren ondasunakin katibu zeramazkien: eta aen artean Lot, bere emazte, eta alaba birekin, eta bere ondasun guziakin. Bereala Abranek guziaren berri jakin zuen, igesi etorri zan bategandik: eta karidadeak alaiturik, eta beroturik, bere mirabe eta serbitzarien artean irureun, eta emezorzi egokienak autu zituan: eta aekin, eta beste lagun batzuekin lasterka garaia eraman zuen lau Erregeen ondoren joan zan: antxitu, goitu, edo benzitu zituen: iges eragin zien: eta zeramazkien katibu, eta ondasun guziak, ala artu zituenak, nola erenak kendu zien: eta bere illoba Lot, bere familiarekin, eta ondasunakin libratu zuen. Eta orduan, gerratik zetorrela, bidera irten zitzaion Abrani, Eskritura Santuak, Jaungoiko guztiz altu, edo gorenaren Sazerdotea deitzen dion Melkisedek Salengo Erregea, Jesu-Kristoren antz, edo figura bizia izan zana: onek ofrendatu zituan orduan ogia eta ardoa Aldareko Sakramentu, eta Sakrifizioa ordutik aditzera ematen zituana: eta bereala ondoren bedeinkatu zuen Abran, eta Jaungoikoari eskerrak eman ziozkan zerren aren etsaiak goitu zituan: eta Abranek lau Erregeai kendu zien guziaren amarrena Melkisedek Sazerdoteari egin zion: ordutik, (San Paulo Apostoluak esplikatzen duenez, ad Hebr. 7.) ezagutzen zuela Jesu-Kristo izango zala betiko Sazerdotea, eta guzien gañekoa. Eta Sodomako Erregeak ere bidera Abrani irten zion: eta esan zion, libratu zituan bere mendeko personak eman zegiozkala, baña ekarri zituan ondasun guziak beretzat izan zitzala: baña Abranek interesarik batere beretzat nai izan etzuen: esan zuen, etzuela nai, esan zedin, iñork Abran aberastu zuela: eta interesagatik ibilli zala: eta arrezkero luzaro aurrik izan bage egon bazan ere, Jaungoikoak azkenik eman zion, ofrezitu zion ondorengoa.

        G. Abrani Jaungoikoak eman zion promisioko semea zein izan zan? E. Isak santua: bere emazte Saragan luzaro anzu egon ezkero, eta larogeita amar urte kunplitu ezkero, izan zuena. Eta beste emazte bi, eta aetan beste seme batzuek izan bazituan ere: Isak bakarrik izan zan Jaungoikoak esleitua, aren promesen herederoa izateko: eta Jesu-Kristoren figura, edo antz eder bat izateko.

        G. Zertan izan zuen Isak santuak Jesu-Kristoren antza? E. 1. Aingeruak aren sortzea Abrani aurrez aditzera eman, edo errebelatu zion: eta bera, eta Sara sarturik bazeuden ere, sinistu zuen: 2. Isakek bere inozenzian, eta santidadean Jesu-Kristoren bizitzaren antz, edo semejanza andi bat agertu zuen: eta 3. Isak santuaren sakrifizioak Jesu-Kristoren eriotzaren, eta erresurrezioaren misterioa aurretik aditzera eman zuen.

        G. Nola gertatu zan Isak santuaren sakrifizioa? E. Jaungoikoaren Majestadeak probatu, eta argitara eman nai izan zuen Abran bere serbitzari andiaren fedea, esperanza, eta karidadea: eta oriek agertu bear zituan obedienzia. Agindu zion, mundu onetan zuen gauzarik maiteena, bere seme Isak, bere ondasun eta promesa guzien heredero izan bear zuena, mendi baten gañean sakrifikatu zegiola, au da, bere eskuz ill zezala: eta aren biziaren ofrenda egin zegiola. Aitzaki andiak, eta arrazoi guztiz indarsuak gogora bazetozkion ere Abran santuari sakrifizio bat ain gogorra, eta nekeza ez egiteko, sinistu zuen, eta esperatu, edo uste zuen Jaungoikoak bere hitzak, eta promesak kunplituko zituala, bere semea piztuko bazuen ere: Jaungoikoaren borondatea, eta agintea egitera bereala jarri zan: berekin eraman zuen mendi gañera bere seme maitea: eta onek bere bizkarrean eraman zuen sakrifiziorako egurra: lotutzen utzi zan sakrifikatua izateko: aitak eskuan zuen, ura illtzeko ezpata: besoa jaso zuen bizia bere semeari kentzeko: baña Jaungoikoak eragotzi zion sakrifzioa bukatzea: besoa detenitu zion: eta aitaren, eta semearen obedienziaz, eta borondateaz kontentatu zan. Eta aren orde sasi artean trabaturik zegoan ari bat sakrifikatzea agindu zion: eta ala egin zuen: eta bere semea eriotzaren atzaparretatik libraturik, eta bizirik zuela, etxera itzuli zan. Eta orra misterio, eta dotriña andiak dituan gertaera miragarri bat: Jesu-Kristoren sakrifizioa, eta eriotza gurutzearen gañean, eta aren erresurrekzioa anziñatik aditzera ematen zuena: eta gurasoai txit argiro erakusten diena, nola eren humeak Jaungoikoari sakrifikatu bear diozkaten: bada erenak baño, Jaungoikoarenak geiago dira. Eta ala Jaungoikoarentzat batez ere azi, eta bizi erazo bear ditue, eta ez munduarentzat, eta deabruarentzat, askok gaizki egiten duen bezela.

        G. Eta Abranen denboran beste gauza andirik gertatu bazan? E. Bai: Sodoman, eta aren gertuko beste lau errietan bizi ziran jendeak ainbesteraño gaiztotu ziran: nun aen pekatu izugarriak, eta lotsagarriak deadar Zerura egiten zuen benganza, edo kastigu eske. Jaungoikoaren Majestadeak bere justiziaren exenplo arrigarri bat orduan eman zuen. Aingeru bi bidaldu zituan erri aek ondatzera, erretzera, eta kiskaltzera; barruan zituan gizon eta emakume guziakin: Abrani lenago kontu eman zion Jaungoikoak. Abran bitarteko jarri zan: eta baita amar justu baizik arkitzen ezpaziran erri aetan, guziai barkatuko ziela agindu zion, baña etziran arkitzen: bere illoba Lot bakarrik bere familiarekin arkitzen zan justurik Sodomako errian: eta ura Jaungoikoak libratu zuen bakarrik bere emazte, eta alaba biakin. Aingeruak Loti kontu eman zioten nola erri aek ondatu bear zituen: eta etxetik, eta erritik atera erazo zituen: eta laster alde egitea, eta atzera ez biurtzea agindu zien: eta aek alde egin zuenean, Jaungoikoak bereala bidaldu zuen erri aen gañera suzko, eta zufrezko euri jasa aiñ arrigarria, nun bereala guziak erre, kiskaldu, eta desegin zituan. Eta zerren Lot santuaren emazteak urrutitik otsa aditu zuenean, atzera begiratu zuen, bertan ill zan, eta gatz arri egiñik gelditu zan, beste askoren eskarmenturako. Eta orra N.K., Sodomatarraen kastiguan pekatarien itxutasunaren, eta sufritu bearko duen Infernuko suzko, eta garrezko betiko kastiguaren antz bizi bat. Bada dio Jesu-Kristok berak aren hitz santua aditu, eta ikasi duen Kristauak, baldin gaizki bizi badira, Sodomatarrak baño kastigu andiagoa izango duela. Baña gakizkon Abran, eta Isak bere seme santuaren bizitzari: eta aen ondorengoai.

        G. Abran santuak norekin ezkondu erazo zuen bere seme Isak? E. Arenzat emaztea billatu eragin zuen Mesopotomian, bere jatorrian: eta Jaungoikoak esleitu zuen Rebeka, emakume zinzo, eta modesta bat, Isak santuaren emazte izateko.

        G. Eta Isakek zenbat hume izan zituan Rebekagan? E. Bi seme biokiak: batari Esau, eta besleari Jakob deitu zienak: biak alkarren antz gutxi izan zuenak: eta aen artean Jakob autu zuen Jaungoikoak Isak bere aitaren herederoa, Jesu-Kristoren aita aurrekoa, eta Israelgo puebloaren fundatzalle prinzipala izateko: bada Israel deitua bera ere izan zan.

        G. Eta norekin ezkondu zan Jakob santua? E. Lau emazte izan zituan: eta aetatik amabi seme eta alaba bat izan zituan. Eta semeai derizte amabi Patriarkak, edo familien buruak: eta aetatik etorri dira Judu guziak.

        G. Nola derizte amabi Patriarka aei? E. 1. Ruben: 2. Simeon: 3. Lebi: 4. Judas: 5. Isakar: 6. Zabulon: 7. Dan: 8. Neftali: 9. Gad: 10. Aser: 11. Josef: 12. Benjamin. Eta alabari zeritzan Dina: eta onek bere arintasunarekin, eta erabageko kuriosidade, edo alde aetako emakumeak ikusi naiarekin, atsekabe andiak aitari, eta senideai eman zizten: eta kalte arrigarriak ekarri zituan: alako batean Sikengo emakumeak ikustera joan zan: ango Erregearen seme nagusienak ikusi zuen: bereala beregana ekarri zuen: eta arekin ezkondu nai izan zuen: Jakob bere aitak, eta senideak ori igui zuen: eta zirkunzidatu bage ezin Dinarekin ezkondu zitekeala aditzera eman zioben: jarri zan artara Prinzipe ura, neskatxari artu zion amorioagatik: eta ari gusto emateagatik aren aita bera, eta Sikengo guziak orobat zirkunzidatu ziran: eta orra irugarren egunean zirkunzisioko zauriakin erituenak, eta argalduenak zeudenean Dinaren anaia osoak ziran Simeon, eta Lebi armaturik, benganza artzera joan ziran: eta Sikengo guziak Erregeraño ill zituen: Jakob santuak ori jakin zuenean, agitz sentitu zuen: eta bildur zan alde aetako jende guziak aren kontra altxatuko zirala: eta Jaungoikoaren konsejuz andik alde egin zuen: eta Jaungoikoak gorde zuen: baña orra donzella gazte ikusizale, eta eren buruak erakutsi, eta agertuzale diranenzat exenplo arrigarria. Orra zenbat kalte eren buruai, eta eren gurasoai ekarten dizten, lotsatiak, modestak, eta erretirozaleak eztiranean.

        G. Nola deitzen dira eskuarkiro Jakoben seme, amabi Patriarka aetatik sortu ziran familiak? E. Juduen amabi Tribuak deitzen dira. Baña jakin bear da: ze Josef Patriarka antxaren seme biak, Efrain eta Manases, izan zirala Jakob santuak berak autuak, eta izentatuak, Tribu, edo familia biren buruak izateko. Eta ala bazirudian, amairu izan bear zuela Tribu guziak: baña eztira ala ere amabi baizik kontatzen: zerren Lebiren Tribuak, gero Jaungoikoaren kulto, eta serbiziorako, eta orduko Elizlanak egiteko esleitua izan zanak, etzuen parte berezirik izan promisioko lurrean: zergatik Jaungoikoak nai izan zuen Lebitarrak naasi beste Tribuakin bizi zitezen: duda bage eren exenplo, eta dotriñarekin guziak ekarri zitzaen Jaungoikoa serbitzera.

        G. Eta Israelitak, edo Abran, Isak, eta Jakob santuen ondorengoak gozatu zuen beti Jaungoikoak Abrani agindu zion promisioko lurra? E. Abran, Isak, eta Jakob, bizi izan ziran lur artan kanpotarrak bezela: eta aen ondorengo Israeldarrak etziran lur arzaz jabetu, Jaungoikoak promes ura egin zuenetik laureun urte igaro artean.

        G. Zergatik ainbeste denbora luzatu zuen? E. Zergatik luzaro Ejiptoko katiberioan ango Erregeren mendean egon bearra izan zuen.

        G. Zerk eraman zituan Ejiptora? E. Gosete arrigarri batek: eta jakin zuelako, gosete ark zazpi urte iraungo zuela: eta baita ustez ustebage Jakoben seme Josef Ejiptoko agintari, eta Erregeren urrengo gizon arkitzen zala: eta are artu zituan neurri, eta probidenziakin Ejipton goserik izango etzala.

        G. Nola izan zan bada Jose aurretik Ejiptora? E. Jaungoikoarenzat ustekaberik ezta: etorkizun guzia dakusanak bezela, gauza guziak, nai bezela zuzentzen ditu. Jakob santuak Rakel bere emazterik maiteenagan seme bi izan zituan: bata Jose, eta bestea Benjamin: eta onen aurgitez Rakel ill zan. Seme guzien artean maiteena izan zan Jose: eta oni besteai ez bezelako soñeko bat Aitak egin zion: eta orregatik, eta baita pekatu izugarri batez anaiak salatu zituelako, beste senideak gaitz iritsia artu, eta ezin ikusi zuen: asi zan gaitz iritsi ori, Josek, izan zituan, eta batere gaitz bage kontatu zien ames misteriozko birekin: esan zien: guziak kanpoan zeudela, amesetan ikusi zituela amabi garizko azau: eta berarena beste guziena baña altxatuago zegoela: eta beste guziak makurturik agur egiten ziobela: eta orobat esan zien, beste batean, ikusi zituala, eguzkia, illargia, eta amaika izar, bere oñetan etzin zitzaiola, eta adoratu zuela. Orra Joseren geroko goratasuna, eta anditasuna aditzera ematen zuen misteriozko amesak: aren anaiak geiago sumindu zituanak: eta ura saltzera ekarri zituenak. Ona artarako izan zuen era, edo okasioa. Berekin etxean eduki oi zuen Jakob santuak Jose bere seme gaztea: besteak eren artaldeakin kanpoan zebiltzan: bein bidaldu zuen bada anaietara, nundik, eta nola zebiltzen berriak ekarri zegien. Urrutitik ikusi zuenean, eren artean esan zuen: ona nun datorren gure amesgillea, gure agintari izan bear duena: eta bereala illtzeko asmoa geienak artu zuen: baña Ruben anaia nagusienak eragotzi zien: esan zien: etzitzela senide baten odolean eskuak busti: sartu zezela legorturik zegoan potzu andi batean, berez an akabatu zedin; baña asmoa zuen, andik atera, eta aitari biurtzeko: eta potzuan sartu zueneko, andik zijoazen tratulari, edo merkatari batzuek Ejiptora: eta Judas eren anaiaren konsejuz merkatariai saldu zien eren anaia Jose: eta au esklabo egiñik eraman zuen merkatariak Ejiptora: eta an saldu zioben Putifar zeritzon anditsu bati. Eta Aita Jakob Santuari bidaldu zioben Joseren arropa, antxume baten odolez bustirik, edo gantxiturik; eta gastigatu zioben, aren seme Jose abere gaizto batek desegin, puskatu, eta ill zuela. Eta nork esan Jakoben orduko pena, eta naigabea? Ezin iñola ere konsolatu zan bere seme maite Jose era lastimagarri artan galdu zuelako. Eta orra nola gure Jaungoikoaren probidenziak atsegiñak, eta atsekabeak mundu onetan bere adiskide maiteai partitzen dien, aen birtutea probatzeko, eta geiago, eta geiago irabazi eragiteko.

        G. Eta Ejiptoko nagusi Putifarrek nola artu, eta tratatu zuen Jose bere esklaboa? E. Laster ezagutu zuen aren zinzotasuna, eta leialtasuna: bere etxe guziaren, eta ondasun guzien kargua eman zion: bere emaztea ez, ze etxeko beste guziak aren mendean ipiñi zituan: eta nola guztiz ederra, eta egokia zan, bere etxekoandreak berak kariño, naiera, edo amorio geiegizko bat artu zion: bere pasio itxua bein baño geiagotan agertu zion: baña Jose beti eskusatu zan: beti leial Jaungoikoarentzat, eta nagusiarentzat izan zan: eta alako batean bakarrik zegoela agitz tentatu zuen bere etxekoandreak: kapatik ere eldu zion: eta orduan Jose kastoak kapari larga, eta alde egin zuen: eta etxekoandreak kolera bizi batean sarturik deadarrari eman zion: eta egotzi zion falso testimonio arrigarri bat, esaten zuela; bere etxeko esklabo Josek indar egin nai izan ziola; eta kapatik eldu ziola: baña kapa aren eskuetan utzirik iges egin zuela. Eta gezur andi ori sinistu eragin zion bere senarrari. Eta onek bereala, bere aserre bizian ipiñi eragin zuen preso bere esklabo Jose Erregearen karzelan. Eta orra kulpaduna libre, eta koroa eder bat merezi zuen inozentea lotsaturik, eta kastigaturik: baña Jose kastoa, bere konzienziako testimonioa, eta pakea pozgarri zuela, konformatu zan, guzia zekusen Jaungoikoaren probidenziarekin; eta onek ala humillatu, eta beeratu ondoan altxatu zuen Ejiptoko agintari, eta ango Erregearen lenengo Ministro, eta gobernari izatera.

        G. Nola ori gertatu zan? E. Karzelako nagusi, edo kargudunak ezagutu zuen Joseren guzirako prudenzia, eta jakinduria: eta preso guzien kuidadoa berari eman zion: Faraon Erregearen serbitzari bi preso ipiñi zituen: batak zuen Erregeren maiko ardo guzien kargua: eta besteak ogiarena. Oek izan zituen ames bana, txit larritu, eta estutu zituenak: zerren aen zoria, edo suertea erabakitzen zuen: Joseri aditzera eman ziozkaten: eta onek Zeruko argiz etorkizuna ezagutu, eta esan zien: ogiaren kargua zuenari andik irugarren egunean bizia kenduko ziobela: eta besteari lengo kargua biurtuko ziobela: eta oni eskatu zion, Erregeren serbiziora biurtzen zanean, artzaz oroitu, edo akordatu zedilla, nola kulpabage zegoan Erregeri aditzera eman zegiola. Josek esan zuen bezela guzia gertatu zan: baña laster artzaz aztu zan lengo kargura biurtu zan Erregeren serbitzaria. Eta orra nun andik urte bira Jaungoikoak disponitu zuen, Erregeak berak izatea beste ames bi, agitz larritzen zuenak: eta ezin iñork aditzera eman zion ames aek zer esan nai zuen. Orduan akordatu zan Josez Erregearen serbitzaria: eta Erregeri esan zion, nola preso ark amesak asmatzeko, Zeruko argia zuen: eta nola berak, eta bere lagunak izan zituenak explikatu zien; eta ark esan bezela gertatu ziran. Bereala Faraon Erregeak Jose erakarri zuen: bere amesak esan ziozkan: eta ziran, 1. Niloko ibai anditik irteten ikusi zituala zazpi bei guztiz gizenak: eta aek larrean zebiltzala, ondoren irten zirala beste zazpi bei, guztiz meak, eta argalak; eta oek irentxi zituela lenengo zazpiak: orobat ikusi zituela zazpi galburu txit ugariak, eta ederrak: eta aen ondoren beste zazpi guztiz txarrak: eta oek beste zazpiak irentxi zituela. Ames oek aditu zituaneko Josek esan zion Erregeri zazpi urte oetan izango dira abustu guztiz ugariak: baña ondoren etorriko dira beste zazpi urte gosete guztiz andikoak: eta konseju eman zion Faraoni, erri andi guzietan eragiteko granero edo biltegi andi batzuek, eta aetan gordetzeko gariak eren buruetan geroko urte gaiztoetarako. Ederki iritzi zion aren konsejuari, eta pensatu zuen etzuela iñor ere bere erreinuan arkituko, ura kunplitzeko gaiago zanik: eta bertatik bere eskualdi guziak eman zion: eta agindu zuen, Ejiptoko guziak Joseren mendean egon zitezela: ari obedezitu zegiobela: eta bere karroza batean sartu eragiñik, aren aurrean zijoan pregonero bat, Erregeren ordena publikatzen, eta Joseren aurrean guziak belaunikatu zitezela agintzen: eta izen berri bat ipiñi zion munduko salbadorea deitzen ziola. Eta orra munduko goraberak zein miragarriak diran. Eta nola gure Jaungoikoak nai duen bezela gauza guziak zuzentzen dituan.

        G. Nola jakin zuen Jakob Santuak bere seme Jose Ejiptoko agintari zegoela? E. Eldu zan esan degun gosetea Kanango errietara. Ejipton baizik, garirik arkitzen etzan: eta garia erostera bere semeak Ejiptora bidaldu zituan. Orduan ango agintari Jose zegoan: bere burua anaiai ezagutu erazo zien: eren dollorkeria barkatu zien: laztandu zituan: bear zuen gari guzia doarik eman zien: eta erakarri zuen Ejiptora bere aita Jakob bere familia guziarekin: eta guziak ziran orduan irurogeita amar persona: baña laster an geitu ziran: eta pueblo andi bat izatera eldu ziran. Ejipton ill zan Jakob Patriarka, baña Josek aren gorputza eraman eragin zuen Abran, eta Isaken sepulturara Kanango lurrera: eta ill baño lenago Jaunaren espirituarekin argiturik seme guziai etorkizunak esan zien: bakoitzari zegiozkanak: eta Judas bere semeari esan zion aren etxean, edo familian iraungo zuela Israelgo puebloaren aginte prinzipala, munduko salbadorea etorriko zan artean, eta ala gertatu zan: bada Jesu-Kristo agertu zan denboran akabatu zan Judeako buruen agintea. Eta Josek Ejipton noiz artean agindu zuen? Agindu zuen bizi izan zan arte guzian: baña aren gorputzeko ezurrak ere Kanango lurrera denboraz eraman zituen berak agindu zuen bezela. Eta orra, N.K., gaurko historiarik asko, dotriña andiak erakusten dizkigutenak. Jaungoikoak digula arren guzioi fede bizi bat aitatu ditugun Abran, Isak, Jakob, eta Jose Santuai bezela; eta gero betiko gloria. Amen.