J. Zulaika

 

EGUZKI BAT IMAJINATZEN

 

«ni naiz naizena, bai, naizena, ez eznaizena»

(G. Aresti).

 

Hementxe hesteetan luzaro nahasmendu kontrolaezina

Guztia hain alferrik intensoa hain alferrik akabatua

Zer hautsi ote zaigu zeri ote gaude oraindik loturik

Eguzki larriaren dantza iluna gure ikaramenduan honela

 

Hain gorria oro eta dardara palido zulatuan biraka

Hauetxek bizitze bortitzagoaren esijentziak aluzinazioak

Krudeltasun honetaz hementxe gozatzera deliberatuak

Eguzki hurbil bat ezik nola engaina hainbat dizdirek

 

Lurrari abandonatuak eta ezinbestez bizirik oraindik

Hementxe hesteetan derrigorrezko eguzki bat imajinatzen

Maldan behera eta nola zekiagu bada «gizonagoak» garela

Eguzkia irabazteko martxa bat dela sinesten jarraituko diagu