Paulo Iztueta

 

PROFEZIA GUZTIEN KONTRA

 

Marx asko bagenitu...

Freud gainditurik zegok

eta Reich behar diagu...

Zientziak jantzi

behar dik gizatasuna...

Berpiz dezagun Russell laikoa...

 

           Halaxen mintzo zen

           gure letraduna

           uhin berriaren esposetan

           kafetegiago tertulian.

 

Hala ere,

profezia guztien kontra,

gure mende honi

penaz eta mixeriaz

gizendu zitzaion tripa,

gorrotoz bihurritu hesteak,

eta agian halaxe sekulakoz.

 

Bihar sortuko den haurrak

nigar eginen du segurki,

eta egiten ez badu,

hura ernarazi duen hazia

ez da izanen lur huntakoa,

eta orduan ez dugu nehor

berpiztu beharrik izango.

 

Bitartean,

egiaren mahainean,

ene egia eskatzen dut

errespetu guztiarekin.

 

Hauzi huntan

arrazoinak

partikatzeko,

Orixeren Euskaldunari

Arestiren mailua eskaintzen diot,

eta Arestiren Herriari

Orixeren laia.