Iratzeder

 

EGUN BELTZAK...

 

Egun beltzak

izan ditu nere bihotzak,

bainan egun osoak, beroak

ezin ederragoak.

 

Egun beltzak Afrikan

Beltzekin borrokan.

Egun beltzak,

nahiz bazen

argi eta iduzki,

nahiz bazuen ene bihotzak

miragarriko egitekoa:

nundik nolaz erein Jainkoa.

 

          * * *

 

Leihotik banuen hor

zuhaitz bat hezurra bezein idor;

lur kiskalduan

zuhaitzaren pean

iratzerik ezin sor.

 

Noiz agertuko zain neri

euskal-lurreko iratze-ostorik

aizez hanpaturik, uriz mozkorturik

mendi gainetan dantzari.

 

          * * *

 

Zortzi egunen buruan

iduzki beroaren beroan

zuhaitzari sortu zaizko

euskal-lurrekoak

bezalako

iratze-ostoak.

 

Ez banu ikusi

ez nuen sinetsiko:

hola

sortu zitakela

haitza bezein ederreko

zuhaitz hortan ostoak

iratze-osto bizi baino biziagoak.

 

          * * *

 

Dohatsu, dio Jaunak,

ikusi gabe sinesten dutenak.

Bai. Beltzen lurrak

lur legor eta idorrak,

izerdi eta nigarrek busti-eta,

emanen dauku

Jainkoaren uzta.

 

Zañanado (Dahomey-n)

75-2-23