Juan Ignacio Goikoetxea «Gaztelu»

 

GEZURRA DIRUDI

 

gezurra dirudi, baina

        baratzean larrosa

        loreak ematen ari zen

 

etzekien oraindik

atomo bonbaren berririk

 

gezurra dirudi, baina

        adar gainean xoria

        arraultzak berotzen ari zen

 

etzekien oraindik

atomo bonbaren berririk

 

gezurra dirudi, baina

        etxe-atarian oiloa

        xomorro bila kafaka ari zen

 

etzekien oraindik

atomo bonbaren berririk

 

gezurra dirudi, baina

        amaren bularretan haurtxoa

        ditia edoskitzen ari zen

 

etzekien oraindik

atomo bobaren berririk

 

gezurra dirudi, baina

        neska gaztea atzarririk

        amets ederretan ari zen

 

etzekien oraindik

atomo bonbaren berririk

 

          * * *

 

eskerrak etzekitela

atomo bonbaren berririk