Mikel Zarate

 

PENTSAMENTU TXARRA

 

Biloizkeriaz jantzi zuten

biloizkeria begitan duten

gixaxo itsuek,

eta zuek

niri eman

aingeruen goizean.

 

Lirdinga ta likits

(lizunkeriaren bits),

pentsamentu txarra

bakarra

zen

orduan

irudimenaren

ziegan.

 

Maite-zoro,

egunoro,

jarri ninduen,

ta zer zen

osorik

jakin nahirik,

biloiztu egin nuen,

bat-batean,

gizonen goizean.

 

Biloiztu egin nuen...,

ta biloizkeria kentzean,

dardara bihotzean,

naskagarri

ta izugarri

bihurtu zen

maiteena,

bat uste nuena

asko bai ziren:

hau beheratzeko

gurari,

hori salatzeko

nahiari,

hura iltzeko desio,

irudimenezko madarikazio...

 

Biloizik eraman diet

gixaxo itsuei,

biloizik ematen dizuet

zuei.