Fernando Artola «Bordari»

 

OROITZAPEN ARO

 

Arestian,

berria ikasi.

Aresti il da...

 

Ar beza atseden

harrizko olerkariak.

Goian bego adiskidea!

 

Lagun:

Nere goraintziak

otoitz mezua luke,

zorraren truke.

Bearrean baliatuko

al zera; ori nai nuke.

 

Batean,

erromantikoa naizela

zuk esan;

eta asmatu!!

 

         * * *

 

Arako ari talka artan,

AMA’ren etxean

Aloñan,

lagun-berri giñan.

 

Bi aritu ziran,

beti norbait bear ta,

mingarri ta penagarri,

gogor topeka.

Oroitzen al zera?

 

Zu, euskeldun berria,

adorez betea,

amets-uts etorria.

Biurri eta minkor

Oldartsu ta eraginkor

Jator!

zure esanetan.

 

Gero or eta emen,

ezin egona nabarmen,

Ontzi berean arraunlari.

 

Etziñan orekan

egoteko kastakoa.

Ez arraiepola!

 

Sutauts bikaiña zu

dunbots egiteko!

Beti aspergaitz

zure ildoan langille.

 

Basa-larra lez aginka,

sagar-makatza

bezela garratza,

minkatza.

 

O! euskaldunaren sortea!

Nik zuri

Zuk neri

Oker zabiltz

Ori ez da bidea!

 

Zuk zurea

Nik nerea.

 

Besteak Aloñan

gu biok Bedoñan

Topeka.

Arrikada bizian arrika.

 

Ostera,

zure Fede-Harria

garaitu.

Kristauki ninduzun

barkatu.

Ta gure adiskidantza

sendotua gelditu.

 

Zu, zanpatzaille galanta,

biotz-handikoa

ziñan agertu!

 

Nola ez nik zuri eskertu!

 

Esan gaitz bazait ere

gazteak zureganatu dituzu;

ara or zure lanaren indarra,

zure senaren garra.

 

Harria’rekin eraiki

duzu olerkia,

Zuk itxura aldatu

onen giroa,

illun zegoana argitu

argi zegoana illundu.

Gauza bitxia!

 

Eta,

O! malurraren malurra

Euskaldun olerkari jator lez.

gazte eraman zaitu Bere ondora!

 

Zer egiñ betean,

eskuak orean

eta joan egin zera!

 

Agur! laister arte.

 

Emen, arritsu utzi duzu guzia.

Harria ez da txarra egiteko bidea

Baliatzen ikasiko bagenu,

O! nolako zoria.

 

Elkar barkatzen eta eramaten

ikasiko bagenu,

askozaz obea!

 

Pakea egiteko

izan dedilla zure nekea;

zure sufrikarioa,

ta eman duzun bizia.

 

Aitaren etxean zaude

Pausa-Leku egokia.

Ukango al dut,

nik ere zuk bezela,

bertan tokia.