Juan Ignacio Goikoetxea «Gaztelu»

 

HERRIAN ODOLA

 

Noiz, nun, nola dario

herrian odola?

Urak gorritu dira,

orain ez Urola.

 

Abuztuko ilargi,

ilargi betea;

lotsagorritan dago

laiñotan gordea.

 

Artaldeko bildotsak

otsoen hortzetan;

ur zikinduen kulpa

zuzenen kaltetan.

 

Baratzeko larrosak

bost orri gorri;

bostak odoletan

zauriz hilgarri.

 

Barne guzietan

amorru larria;

ez da hilen horratik

ikaraz herria.

 

Bada lagun presturik

burdin-sarez hertsi;

Jagun ezpagatzaie

behar dute etsi.

 

Zer da hobe, hil ala

itxaropen hutsez

ilun beltzean iraun

egunez ta gauez?

 

Zenbat ilargi bete

joanak alferrik!

Laiñotan datza lurra

ta urak gorririk...

 

Kobla hauk ondu ditut

gorderik harpean;

karranka hotsez doaz

beleak aidean.