Juan Ignacio Goikoetxea «Gaztelu»

 

HIRE GOZOA, HIRE NAHIGABEA...

 

Nere illoba Maria Jesus,
Marisol, Arantxata Maritere-ri

 

argiaren errainu bizietan

ala lainotan bildutako lur bazterretan

 

           hire gozoa

           hire zaporea

           esanen dut

 

ametsezko goiznabarrean

ala arrats-beherako urdinarrean

 

           hire gozoa

           hire zaporea

           esanen dut

 

urdina ta berdea ta ubela uherduraz nahasten direnean

ala ur garbien — ai! orain zikinen — murmur hotsetan

geldi, mehe, ixil-ostuka belarrira

 

           hire gozoa

           hire zaporea

           esanen dut

 

erreka zokondoetan zozoari

ala ilargi xuritan errexiñolari ikasi bezala

 

           hire gozoa

           hire zaporea

           esanen dut

 

zuhaitz-adarrak iharrosten dituen haizeari

ala hodei beltzetan lehertzen den ihurtziriari entzun bezala

 

           hire gozoa

           hire ikara

           esanen dut

 

itsaso zabal narean

ala uhinaldi harroaz haserre denean

 

           hire gozoa

           hire hizialdura

           esanen dut

 

ogi ta ardoz joritutako soroetan

edo bonbaz desegindako lurraldeetan

 

           hire gozoa

           hire laztura

           esanen dut

 

haurraren keinu estreina berrian

edo alargunaren esku urratuetan

 

           hire gozoa

           hire nahigabea

           esanen dut

 

artzainaren kantu-xarameletan

edo ximinietako xistu zorrotzetan

 

           hire gozoa

           hire asaldura

           esanen dut

irribarrezko eta nigarrezko harremanetan

edo bakartasuneko besarkada hotzetan

biziari ohartzeko

 

           hire gozoa

           hire herstura

           esanen dut

 

zuzengabekeriaren kontrako borrokari eusteko

edo gizaseme kateatuaren libertade bideari jarraitzeko

 

           hire gozoa

           hire lehiadura

           esanen dut...