Mikel Zarate

 

EUSKAL LITERATURAREN ARROKERIA

 

Etxe ederrak dituzte,

etxe ederrak

nire auzokoek,

ta zenbat loretegi

ta zuhaitz nabarmen,

zenbat kotxe eder,

zenbat ondasun,

zenbat jende...!

Zenbat aberats

ditudan hemen,

mutilzahartu zaidan

txabolari parrez!

Eta mindu

egin naute

aberats arroek,

ta arrotu egin naiz

ni ere,

ezinaren ezinez,

ta auxe

esan diet:

«Pobrearen egoera

zuena baino obe.

Ezin didazue

ohostu ezer,

ezin lapurretarik

niri egin!

Hale!»