Daniel Landart

 

ANDERE HANDI...

 

Andere handi, andere handi

Andere handi bat iduri

Itzuli-mitzuli...

Begi-keinuka, ardura deika

Andere hori ari zait neri

Itzuli-mitzuli

Dena tripustelkeri.

 

Andere handi, andere handi

Handi bezain itsusi...

Itsusi, itsusi:

Suge eztena, zaia beltzak

Heriotzaren hortzak

Andere hori, andere hori

Ezin dezaket ikusi

Baita zinez beldurgarri.

 

Andere horri, andere horri

Iheska nabil, iheska

Noiztenka, noiztenka...

Baina ba dakit, ba dakit garbi

Bihar ala etzi

Andere horren beso-artera

Beharko dutala erori...

Erori, erori.

 

Andere horrek, andere horrek

Behin betiko

Bereganatuko naunean

Egun batean

Ez dut nahiko

Lorerik

Negarrik

Are gutiago

Laudoriorik.

 

Ehortz nezatela, ehortz nezatela

Langileak, LANGILEAK

Ehorzten diren bezala:

Xume-xumeki; xume-xumeki.

 

Eta zulo barnean

Geldituko naizenean

Bakar-bakarrik eta hotz-hotza

Hotz-hotza

Zuen bizitzak segi beza,

SEGI BEZA!