ALPESETAKO MAGALEAN

          (Angel Ortizi)

 

Alpesetako magalean, iadanik eskuetan huen ilunabar gazte hura

gehiago dastatzeko aukerarik gabe,

larratxorien konpasean basolarien kantua errepikatuz

irauli berritako pagoen besoetan lo

izerdizko sentimenduz agurtu ginduan.

 

Gaztetasun traidoreak hogeita lau urte ebatsi zizkian

ilusioz beteriko adaska gaztea aizkoraz ebakiko bailitzan.

Ez dik aizkorak adaskarik harrapatzen gizonaren eskuetan ez bada

ez gaztetasun traidoreak engainatzen bizimin eroaren arriskutan ez bada.

 

Hire esku umoak begiratu gabe

hire ahurretako malko garratzetatik edan gabe, bidali haugu

ur haziak daraman katakumea bezala, hilerri krudelerantz.

 

Heriotz agurrak eta odolezko azken diosalak

soilik bazkatzen duen herri hozpel honetan

unibertsoa umanoagotzen doala zirudik

ortzean ordea nabaria duk usapalen hegada pasakorra.

 

Heriotzaren hoztasun mutua

horditurik zelebratzen dugunok aldiz

irri ergel bat igorri diagu barneruntz.

Eta zigarro bat erre

zeruak zeru, lurreko eternidadean

hegalik gabeko AINGERU izan zareten oroitzapenetan.