ESTRAINAKO GAUZA HAUNITZ

 

Adiskide baten heriotzat ilunki mintzatzea...

Gaztainondo zahar baten orpoetan negarrari ematea...

Euri tanta freskoz basituriko

neskatila ero baten ditiak laztantzea...

Begi ñabar biren negarte urrunean

maitasun pasakor bat aurkitzea...

Hegaztien amodio kantuz itoa

ilunabarra itzaltzen ikustea...

Udazken haize ero honen ferekutan

horbelik sintzeroena bereiztea...

Zakur mantso baten lepagaina

desesperaturik balakatzea...

Deserturik anonimoenaren erdian etzanik

amaigabeki zerua behatzea...

Musika oinarririk gabe

doinu ergel bat marmarikatzea...

Primaderari lorerik eskatu gabe

sagar bat supituki hozkatzea...

Errege batek urrezko aulkian bezala

itsasarri borobil baten gainean ene gorputza sentitzea

eta, munduko hiririk habitatuenean

katu beltz ernari baten bakardadeaz oroitzea...

eta beste estrainako gauza haunitz eska dezakegula

arraiten zidan iragan egun batez

XX.mendeko gizaseme heldu batek.