limosna ematea gauza ederra da

baina hartzea hobea

(K.B.)

 

 

LEITZA (POEMA)

 

Hona Leitza!

          —gure arreba zaharra—

          putreen habia bezala

          soineko adaska arrez jantzia.

Hona! Aizan, Okabio, Akutio...

          —gure anaia minen— malko isilak

          Erasote eta Gorriztarango mazeletan behera

          gure sabela hezatzera datozenak.

Hona Oialde mendiak!

          —gure amaren bular guriak—

          zeinetatik zurrupatuz hazten diren

          leitzar seme gazteak.

Hona! Goiko eta Azpiko errotak

          —gure arbasoen umatoki antzuak—

          egun, herioaren bizkarrera amilduak.

Hona! San Migelen hilerri hozpela

          zerura gabeko kristau galduen

          pasalekurik ilunena.

Hona! —gure arreba zaharra— bada

          amesturiko paradisu ororen antzera

          arantza eta mihizto gaiztoz inguraturik ere

          zabalik eskaintzen den gorputz biluzia.

Hona! bere umatoki antzuak

          bere sabela eta bular zuriak

          hona bere sukalde epela!