Goiztiri oskarbi batetan, Atenastik hiru lekoatara kokaturiko herri tiki mitiko batetara sartzerakoan, hartzuri landuz eraikitako basilika baten paretean, tupa harriz zerbait idazten ari zela harrapatu zuten errumes zahar bat. Eta ez si eta ez no, zarpatik hartu eta arrastan eraman zuten bide lohi haietan barrena. Esaten dutenez izugarrizko delitua izan behar zuen garai hartan basilika, monastegi eta antzeko etxe sagaratuetan hitz erditxo bat jartze hutsa. Eta itxura denez errumas gizarajo hura ere horrexegatik juzkatu zuten, berak halakorik asko uste ez bazuen ere. Halere, ez dira gauza guztiak txarrerako izaten, eta errumes urrikalgarri hark idatzi zituen hitzak, itxura gaiztoko judizio hura zela medio jaso izan dira. Bai noski, hitz arruntak dira errumes hark utzi zizkigunak, baina aldi berean mezu sarkorra damaigutenak.

 

 

NON EDIREN EZTIRIK

 

Edozein ezagunek

diosala egiten digun

egunurratze honetan...

Oharkabean edo

ezagunak oro

bestaldera beha

iragaiten zaizkigun

arratsalde honetan...

Nehorekin topatzeaz

lotsa baizik

pairatzen ez dugun

arrats honetan...

non ediren eztirik

gizarte ajeatu honi

darion esne mindua

gozatu nahirik ere?