Joannes d'Iraolaren poema bilduma
Patziku Perurena

CAP, 1985

 

 

Denbora ilunetan erreligioneak zituen obekienik jendeak

gidatzen, gau beltzean itsu bat gure bide-erakusle onena den

bezala. Gauza ergela da, eguna denetik oraindik ere itsu

zaharrok bide-erakusletzat gordetzea.

(H.H./Igela)

 

 

ENE BEGI KANTABRO LAUSOAK

          (itsu orori)

 

Eboluzioaren bidagurutzeetan

haserretzen diren begiak...

 

Aulki zahar batetan

eserita dauden begiak...

 

Ilunaren auriak

hunkitzen dituen begiak ...

 

Nekearen itzalpean

etzaten diren begiak...

 

Huntzaz josiriko

habe ustelduen bularretatik

edaten duten begiak...

 

Bakardadearen ezinak

izerditzen dituen begiak ...

 

Emetasunaren etxea

apaintzen duten begiak ...

 

Ilunabarraren besoetan

ametsetan dauden begiak.

 

Kolgaduratik zintzilik

dauzkadan begiak

 

Anaia bizkien aitzinean

ahalge diren begiak...

 

Lintzura ahortuetan

egarritzen diren begiak...

 

Egiari mugarria

ezartzen dioten begiak ...

 

Hodeien baretasunean

urkatzen diren begiak...

 

Desiraren biderik

ezin urratu duten begiak ...

 

Amalurraren goseak

hozkatzen dituen begiak ...

 

Erroitzetan behera

odoltzen diren begiak...

 

Naturaren musikaz

mozkortzen diren begiak ...

 

Eguzkiaren dizdirak

aspertzen dituen begiak...

 

Itsuen sentimenduz

Koloreztatzen diren begiak...

 

Betikotasunaren harleiho herstuetatik

beha ditudan begiak...

 

Eta, tantaka ari den herio mantso hau

bazkatzen duten begiak dira

ene begi kantabro lausoak.

 

Joannes d'Iraolaren poema bilduma
Patziku Perurena

CAP, 1985