Poema hau ere bilduma berekoa da, aurrekoaren bilduma berekoa alegia, eta noski gartzela berean izkiriatua. Baina segurantziz, zein zeldatan izkiriatua izan zen ez dut jakin ahal ukan. Naturarekiko duen erreferentziagatik, behar bada izan daiteke aurrekoaren egile berarena.

 

 

LURRAREN GORPUTZ SINTZEROA

 

Inorena izan gabe orok hebaintzen dugun

lur ahul ezindu honi

maitasunezko izerdia dario

mendi lepaketan behera

eta apirilaz dutxatzen da.

Maiatzaz perfumatzen, bere garbitasuna

abuztuko zapi honduz lehortuz.

Irailean eranzten da lotsatiki,

urrian bere gorputz emea aireztatu.

Ilbeltzean soineko zuritan paseiatzen

maitasunaren izozte ilunetan barrena.

Baina gizonak ez du bere maitasunik senditu,

lur umo honen gozamenik nabaritu.

Maitasun autosufizientea egiten baitu lurrak

eta inolako pretentsiorik gabe erakusten

bere gorputzari darion liluragarritasuna.