Kalifornian, edo xehekiago erraiteko Sakramenton, hirutan hogeita biga urte luze sekretari eman zituen abokatu buruzuri batek, erretiroa eman zioten egunean, izkribu asaldagarri bat utzi zuen notariaren mahai gainean. Bere lankideek ez zuketen halakorik asko espero, baina buruzuri zaharrak aspalditik erregu egina zuen, eguna iristean bere gogoetak erakutsiko zituela. Eta egin ere, halaxe egin zuen, bere lagunengan sekulako harridura sorraraziz. Hauxe izan zen bere azken gogoeta:

 

 

GOGOAN DITUT

 

Gogoan ditut parlamentu dotoreetako harlanduak

Gogoan, sala erdian altzatzen diren zutabe ezinduak

Gogoan, hiri nazkagarri honetako oinazeak

korrazpietara gidatzen dituen uso urbanoak.

Gogoan ere, zilarrezko karpeta handitan

alferrik gorderiko izkribu meta lizunduak.

Gogoan berunezko gau triste haietan

ahantziriko begibakar eta legendunak oro.

Gogoan halaber, beste hainbat pasadizo

eta nik dakita zenbat kasu sinatu gabeko.