Aininderor gaztaroan, nerau

ikurrin et'ikurrik gabe,

ezpainetan otoitzik ez, birau-

itzalik ez, baikor, ez herabe.

 

 

EGUBERRIETAN

          (J.M.ri)

 

Eguberrietan...

Agin eta gorosti asesinatuen adarretan

keinuka eta bakarti, urkatu egiten dira bonbilak.

Eguberrietan...

Gau zaharren amantalpean, ur bihurtzen

Betlhengo estalpean elurrezko teilatuak

eta, Iesus Haurraren zilborrerat erortzen

zazpi probintzietako itokin kostunbristak.

Eguberrietan...

Goroldioz asetzen dira basabereak

eta kabaleak oro ahotzez.

Hiru errege zolik ereiten dute fede hazi gaztea,

kirieleisonka doazen ibaietatik eragaiterakoan,

—Bartoloren gisa— lastozko zubi ahulak eraikiz.

Eguberrietan...

Sienprebiba berdasken freskotasuna urtaroen ezpatak

bezala,

hiltzenago gaitu tradizioaren sentimenduak, eta...

elurte urrunaren beso zurietan zurrungaka gogora ohi

ditugu

Mirandek maitaturiko neskatoen xarma

eta Charles Chaplin-en gorpu geldia.