ZAMARI ZAHARREN ANTZERA

 

Zure begien labana

gorputz guztian barrena

gaur gabean ez dut somatzen

ilunaren kargamena.

 

Itsasandere zekena

soinaz oro lerdena

begi biak erauzi eta

so egidan udatzena.

 

Ene eskuen errekak

zure urez beteak

erhi artean itotzen zaizkit

ilunabarrero ahateak.

 

Egiak ez du laztanik

ez herioak ihesik

hari ahul batek sostengatzen nau

bizi honetan zintzilik.

 

Izarrak urre ortzean

andereak ohantzean

bildotsen antzera sortzen dira

haur tipiak bedatsean.

 

Errekaldean ihintza

marloiak mutu dabiltza

zamari zaharren antzera doa

isilik ene bizitza.