AMETSAK ZIUTATEAN

Goizeko orduotan Pasaiak ere

erromantiko irudi dezake,

kobrezko eguzkiak garabien

burdina dirdiratzen duelarik,

txatarra mendiak Jaizkibel baino

edertasun zakarragoarekin

jaikitzen direlarik nasako ohetik.

Goizeko orduotan ziutateak ere

ederrak dira, kalean ez dagoelako

ez autorik, ez jenderik, ez zakurrik,

eta despistatu eta pentsa genezake

Utopiara iritsi garela azkenean,

inurritegi karratuak jendea

okatzen hasten diren arte.