HAURRAK EDERRAK ZERATE 1

Zeri egiten diote barre haurrek?

Agian zuri, zimelduriko haurra,

eskuak nola arraildu zaizkizun

konturatzen baitira haurrak,

eta haurren eskuak leunak dira.

Baina zeri egiten diote barre?

Oreka gordetzen duzula iduri

eta erortzen zarelako edonoiz,

min hartzen duzulako, agian,

eta irrigarria da bestearen mina.

Oraindik ez dakite zer den mina,

eta horregatik ezin dute jakin

zer den poza ere. Eta orduan,

zeri egiten diote barre haurrek?

Barre egiten dute barre egiteagatik,

barrea orain eta hemen delako

eta zu atzo izan zinen haurra,

daborduko ahaztu zaizun arren.

Horregatik da hain ikaragarria

haurren barrea, barre beldurgarria,

burezur okrearen irriaren aurrerapena.