NEVADAKO ARTZAINARI (I)

                Airea: Andereño bat ikusi nuen.

Amerikako mendi ainetik

artzain bat dugu aditu.

Bere atsegin bai eta penak

kantuz dauzku esplikatu.

Gazte maitea, zure solasez

batere ez naiz harritu.

Gazte denboran, toki berean,

ni ere bainaiz kurritu.

Zure kantuen oiharzunak du

inarrosi Iramendi.

Umore ona eta kuraia

badauzkatzu beti handi.

Zure pertsuak ikasi tuzte

orai denek hemen gaindi.

Jainko onaren grazia beti

zure lagun izan bedi.

Amerikako desertu beltzek

etzaituzte zu lotsatzen.

Ardien zaintzen, pertsu moldatzen,

duzu denbora pasatzen.

Zure sor-leku maiteaz zira

naski rdura orroitzen.

Orduan aise hasperen zonbait

bihotzean zaitzu sortzen.

Denbora ona eta elurra

ere gertatzen denean,

Zure kozina egiten duzu

gusturik hoberenean.

Egunaz kurri ibili eta

gero gaua jin denean,

Zure ohia prest-presta duzu

berdin lurraren gainean.

Zure ganbara ez du argitzen

ez eletrika-argiak.

Supazter xokoño hura ez du

ikusten zure begiak.

Zeru gainetik mundu zabala

argitzen du ilargiak:

Haren medioz egiten tutzu

gauaz zure itzuliak.

Guri irri bat ein-arazteko

hau ere duzu aipatzen:

Koziner finak beribiletan

ikusten tzula pasatzen.

Artzain gaizoen modura heiek

ez dira aise bihurtzen.

Baratzetako lanari ere

sudurra dute zimurtzen.

Moltsa luea beteko duzu

laster ene iduriko.

Orduan hunat, Eskual-herrirat,

etzireia itzuliko?

Norbaitez hemen agradaturik

lagun bat duzu hartuko.

Nik kontseilu bat zuri emanik,

etzaizu ez gaitzituko.

Izana gatik horgo andreak

eder eta pinpirina,

Nik aditzea badaukat beti,

hobe dela eskualduna.

Nahi baduzu izan dezazun

lur huntako zoriona,

Hauta zazu bai nexka prestu bat

eta girixtino ona.

1949