URRUNDIK URTE ON

                Airea: Zeruko izarren bidea.

Urte zaharra itzali da

elur-pean,

Berria sortu eta jauntzi

soin berean:

Nun da bada diferentzia

Hen artean?

Urte zaharrak egina du

bere turra:

Ongaitzekin jautsia da

hil-herrira.

Haren esperantza guziak

galdu dira.

Urte berriak on eta gaitz

hartzekoak;

Ederrak asma detzazkegu

gerokoak...

Horrat lerrakor bai bihotzak

bai gogoak.

Halere berdin falta daite

zoriona

Eta etor uste-gabeko

dolumina.

Beharrik etzauku nausitzen

etsipena.

Funtserat-eta agur diot

urteari,

Gomendatzen diotalarik

Jainkoari;

Harek du bakarrik eginen

xoragarri.

Ene maiteak, aurtengotzat

zuendako

Erranen ditut bizpahiru

hamarreko.

Egizue bertze hainbertze

enetako.

Arno onetik baso bana

dugun edan

Elgarren osagarriari

lorietan,

Esperantza lora dakigun

bihotzetan.

Agian urte hunek gaitu

hurbilduko,

Trinka

ahal dezagun orok

eguerriko

Eta kantuz elgar besarka

urtatseko.

1908