GERLAREN ONDORIOZ

                Airea: Adios, izar ederra.

Gerlaren ondorioz

altxatu beharra

Larrerat erori da

eskualdun xamarra.

Dela Xubero,

dela Garazi,

Amikuze bera,

Lapurtar bilakatu,

en'ustez sobera.

Badut, han eta hemen,

plazan ikusirik:

Pilota ala jauzi,

joko orotarik:

Atorra xuri,

gerriko gorri,

gainetik xamarra,

Lerden eta bipilik

beti garaztarra.

Bizarra kenduz geroz

Eskualduna gazte.

Orai bertzerik dago

sudur petik haste.

Frantsesez kanta,

kaskoinez dantza,

pilotan anglesez...

Otxalde, zer diozu

holako urratsez?

Boz ozenik entzun dut,

lehen, mendietan,

Ofizio ederrik

gure elizetan:

Elgar adituz,

xaramelatuz,

han zen han loria!

Pestaren lehen buru

beti gazteria...

Laborari maiteak,

ez barka lurrari!

Lana ohore dela

erakuts haurreri.

Utz Amerika,

herria maita,

holako urtetan

Bizitzia neke da

guziz hirietan.

Ontasun egiteko

huna sekretua:

Igande-arratsetan

goiz huts ostatua;

Bizi xuhurki,

bezti oneski,

ez ahantz geroa,

Fede azkar batekin

otoituz Jainkoa.

1920-eko abendoan