ARRANTZALIA

                («Josetxo»n)

Egunabarraz kalara juan,

Jaurti amubak ondora,

Itxasua Ieun, ixarrak zoli,

Arraña betorren gora.

Arrantzaliak pozez egozan,

Begira euren arlora,

Goiz-eguraldi ezin obia,

Kala guztiz emonkorra,

Zantzo ta barre, mutil maitiak!

Jaurti nekiak albora.

        Egunabarrak, ekarri arren,

        Zeru ta itxaso ederrak,

        Sarri-sarritan, egiten dira,

        Arratzaldian negarrak.

Legorren goitik agertuten zan,

Oiz mendiko bizkarra,

Eguzki bero, odairik baga,

Guztizko zeru ederra.

Tira ta tira, beti etorren

Arraña gora ta gora,

Itxastxorijak kanpo-aldetik,

Etosan arin kalara,

Albista txarrik ezpaekarren

Ziur zan arrain-sundara.

        Egunabarrak, ekarri arren...

Arratzaldian, ordubijetan,

Lañua euken mendijak,

Sortalde gora, ta guztiz illun

Etozan arin odayak.

Gerotxuago ikusi ziran,

Aixe ta itxaso zurijak,

Burriketakaz aldendu ziran

Arrantzaliak guztijak,

Albista txarra eruan eben,

Kalaratubaz txorijak.

        Egunabarrak, ekarri arren...

Biderdi oso egin orduko,

Illundu ziran basterrak,

Burriketak be urratu biar,

Aixe gogorren indarrak.

Mendijak lako baga andijak,

Ausirik euren gangarrak,

Joten ebezan txalupak eta,

Baita gixonen bizkarrak,

Itxasaldeko erri askotan,

Baziran zoli negarrak.

        Egunabarrak, ekarri arren...

Ekaitz onegaz ikaraturik

Itxasaldian ebiltzan

Estutasunez guztiz artega

Zer gertatuten ete zan.

Euri landurrak, arrantzaliak,

Oso estaldu ebazan

Arrigarrizko bildurtasunez

Negar egiten egozan

Eskari asko Jaungoikuari

Egiñaz euren Elixan.

        Egunabarrak, ekarri arren...

Arrantzalien bixibidia

Olan da beti gixonak

Neke askogaz, artuten dabez

Galbide-aldi gogorrak.

Itxaso ta aixe aserriakaz

Errukigarrizko lanak

Sarri-sarritan jazoten yakez

Irudikera okerrak

Zeru ederraz, goixian pozik

Arratzaldian negarrak.