64
BAT EMAN, BESTEA ARTU

        Gure zorioneko Pernando au bazebillen bein beste askotan bezela, zer janik ez zuala. Alakoetan, jakiña!, erretore jaunarengana joan bear eskean.

        —Erretore jauna: anega bat arto emango balit «ixtimatuko» nioke ba...

        —Anega bat arto? Ez zeukeat nik alperrentzat artorik. Lan egin zak, eta ala izango dek artoa. Pernando ixil-ixilik etxeratu zan. Garizuma iritxi zanean, ordea, erretoreari «peatu» bear ziola, ta joan zan sakristira txartel-billa.

        —Ia Pernando: zer esan nai du Santuen komunioak?

        —Artorik ematen ez duana eramango duala inpernuko demonioak.

        —Utzi akiok pakean inpernuko demonioari. Espiritu santua artu bear dek laguntzat, Espiritu santua; ez demonioa. Zer obra egin zikan Espiritu santuak?

        —Etxe bat Errenterin, jauna. («Espiritu Santua» deitzen zioten etxe-egille bat bizi zan orduan Errenterin).

        —Bai e? Joan adi bada Errenteriko Espiritu santuarengana, ta eskatu akiok txartela, nik beintzat ez diat emango-ta.

        Ixildu zan berriz Pernando. Ez orregatik buru-makurturik gelditu.

        Bere baratzan bi kalabaza aundi zituan erretore-jaunak. Aiek baño aundiagorik inguruetan ez zala-ta, arro-xamar itzegiten zuan, eta bai ondo pozik erakutsi ere.

        Joan zen Pernando erretore-etxera, ta neskameari esan zion:

        —Aizan, Mañaxi: erretore jaunak apustua egin din Eulizarreko Joxerekin, ia zeñek kalabaza aundiagoa ekarri. Ta baratzan daukan aundiena emateko esan zian.

        —Ator baratzara, ta erorrek ebaki zak aundiena ara, pareta-kontrako uraxe dek.

        Pernandok «rast!» ebaki, ta bizkarrean artuta eraman zuan.

        Erretore jauna etorri zanean:

        —Eta zeiñek irabazi du apustua erretore? Eulizarreneko Joxek ez zuan gauza aundirik ekarriko beintzat...

        —Baña zer esaten ari zera, Mañaxi?

        Mañaxik guzia esan zionean, erdi-aserre, erdi-parrez gelditu zan erretorea.

        —Kalabaza zalea da orratio Pernando alproja ori. Txarteletan galanta eman diot bada baño berak aundiagoa eraman dit...