AINGERUTXOAK

—Esan, amatxo, zer da aingerua?

    Nun daude aingerutxoak...?

galdetzen dio alargunari

    besotan daukan aurtxoak.

Malko gozoaz estali dira

    amaren begi urdiñak,

bere biotzan esnatu dira

    oroipen maite-samiñak.

Besarkatzen du bere aurtxoa

    estu-estu biotzean,

t'erantzun dio musu bero bat

    luzaro eman ostean.

—Aingerutxoa zer dan, diozu?

    Enetxu, ori galdera!

Aingerutxoa, ene kutuna,

    aingerutxoa... zu zera.