ASISKO ESKALEA

Eskale bat zan: eskale baten antzera bizi

erririk-erri eskean;

t'eskale gaxo baten eran il, bere semetxu

eskale gaxo-tartean.

Baña, maitasun-usai gozoa beti darion

eskalearen izena,

urtetik-urte argitsuago, eguzkia lez,

ludi guzian barrena...!

Nolaz, ba, mundu aztukor ori ezin aztu da

Asisko Eskaletxoaz?

Noletan urte t'eunkiak junda, asetzen ez da

bere izen-usai gozoaz?

Mundu guziak zutik jarrita txalotzen zaitun,

ene Prantzisko mamia,

nola ixilik gaur egon ziteken ain maite zaitun

euskaldun olerkaria?

Zure oinpean mundua artuta, gurutz gogorran

josi zinduan Jainkoak...

Argatik zaude, Jesusen eran beartsuen zai,

beti zabalik besoak.

Maitasun-ezaz ia il-zorian zegoan, ai!, Zuk

ain maite zendun mundua:

eta il ez zedin, Jaunak garretan jarri zizuan

biotz-barrenean sua.

Argatik beti zure alboan goritzen ziran

izotz antzeko biotzak:

argatik beti zure aurrean lore biurtu

oi ziran arantz zorrotzak.

Gabetasuna zan zure emazte maitagarria

izakiak, zur'anaiak;

neke t'oñaze gaitzenak ere, zuretzat beti

atsegiñezko eztaiak.

Zure alboan, lore pollitak pozez dardaraz.

Kantari, berriz, txoriak...

Zu baño anai maiteagorik, ez dute ezautu

izar, illargi t'euzkiak.

Zu baño gizon maitagarririk, munduak berak

ez du ezautu bat baño:

maitasun-mallan, igo zera zu gizona emen

igo liteken garaño.

Argatik ez da zure izenaren dirdist bizia

gizalditan itzaliko:

Kristorekin Zu bat egin ziñan, ta zure izena

Kristokin dago betiko

Kristo gurutzan dakusdanean, Zu ere bekin

ikusten zaitut baturik.

Biok ai!, bizi nere barruan, nere biotza

maitasun-garrez urturik.

Zure neke ta naigabe gaitzez, gurutz-albora

ekarri zendun gizona;

orain otoitzez egizu ori, jakin dezan beiñ

an dagola zoriona.

Arren, begira, begi maitetsuz mundu eroai...

Kupitu Euskal-Erriaz...

Eror-zorian dagon Elizai, eutsi gaur ere

zure maitasun biziaz.

Zuk eta Jaunak maite dezuten euskera ere

ara or doi-doi gaxoa...

Gaxoen lagun ai!, zeran orrek, beraren alde

agertu zure besoa.

Aita Prantzisko! begira azkenez maitasun biziz

zure olerkariari:

Zuk lez, eriotz anai maitea laztandu dezan

Zerura beira kantari.

                                Altzo 1926ko Urrillan