ITXAS BAZTERREAN

BIZITZA TA ERIOTZA

                        Euskal-Esnaleak, 1923gko. sariketan

                        lenengo sariz saritutakoa

Eguzkia iya illean

itsasoai musuka...

    illunabarra...

Aitzak itsas-ertzean

astindutzen, orruka

    itsas zakarra...

Txistuka eldu dira

arrai biziz beteta

    itsas-ontziak...

Ori poza! Begira

kaian dantzan ume ta

    gazte guztiak.

Kai bertatik orduan

lurrin-ontzi arroa,

    jendez beteta,

txistuka, illun zijuan,

amets beltz bat lakoa,

    Ameriketa.

Negarrez kai-aldera

zuzendurik begiak

    ontzi gañean...

Baña ontzia aurrera...

Deadarka guziak

    itsas-ertzean.

Ara, ontzi arroa

sartu da su ta garrez

    itsas nasian...

Etxera andre gaxoa

kai-aldetik, negarrez

    bide guzian.

Bestetzuk bitartean

kaian t'ontzian alai

    dantzan t'ojuka...

Eguzkia iya illean

gorri-gorri itsasoai

    azken musuka...

         * * *

Ori bai bizitzaren

    antza samiña...!

Bizitzari musuka

    eriotz miña...!

Biotzaren kaiean

atsegiñ-ontzitxoa

    sartzen danean,

itxaropen arroa

kaiatik arratsean

    igesi doa

Zalekeri ta ametsez

    beterik doa...

Urrutira ta gabez...

    Ontzi gaxoa!

Biotzaren kaiean

    gero iskanbilla

gogoa irten danean

    atsegiñ billa...

Ta bitartean, berriz,

    egi zorrotza,

bizitzari musuka ai!,

    eriotza...