NEKAZARI GAXOA...!

Lurra goldetzen ari da

        nekazari gaxoa,

ta izerdiz ta negar-malkoz

        lurra bustitzen doa:

illun-illun arpegia,

        illunago biotza,

barruan sartuta dauka

        nunbait ezten zorrotza.

Aida Gorri...! Aida Motxa...!

        dio malko-tartean:

ta goruntz begik jasota,

        otoitz dagi noizean;

geldi-geldik baserrira.

        Beira dago bestetan...

Ai...! Bere naigabe-miña

        zorrotza da benetan...

         * * *

Bere soroan erne da

        erein zuan artoa,

baño iñun ikusten ez det

        nekazari gaxoa.

Baserria ixilik dago,

        larrez josirik lurra,

ta katea apurtu nairik

        zaunga-zaunga zakurra.

Bertako amonatxoak

        esan dit gaur goizean:

Seme zarrena il zioten

        moroak gerratean...

Geroztik ez zuan onik

        ez etxe t'ez lanean...

Bera ere, ai... naigabez...

        il zaigu azkenean