AMORRUA (lagunak I)

 

Zu barik flakatzen hasia ei nintzen

oroiminaren telepredikadorea amatatu

eta tabernara abiatu naizenean.

Varadero kopa lausotua ezpainetaratu orduko

antzinako amorruzko zapore ezaguna

gomutapen ahaztuen bazterrera irristatu da.

Memoria zirrikituz beteriko harkaitza da,

non Prousten madalenak itsas aingira bihurtzen diren.

Horregatik 2001eko hilabete batean

iragazi da legeen aurreko aro prehistorikoa

eta elkarrek elkarri elikatzen zion amorrazioa,

bizi-motore eta helburu.

 

Eta orain badirudi

                       gauza guztiak maionesa bezain light direla,

ematen du

         bizitzaren depositoa tantaka husten dela errepidean.

 

Zu barik urregorrizko zapore honek

zuhurtu baino lurruntzen du begirada.

 

Badaukat zerez flagelatu arrastiria.