AS TIME GOES BY

 

Elkar ezagutu bako egunak

egun deslaituak egutegian,

hilabeteen nekropoli gorria osatuz;

zure bizitza nirearen berri barik

iragaiten dela ziurtatzen delako.

Hutsune ulertezin hau

sofisma garauez elikatu eta,

hala ere, 2. Mundu Gerrako

lehergailu ahaztuaren antzera

segitzen dut, nekearen nekeaz

bakar-bakarrik desaktibatu

eta haragiaren azpiko hezurdura

noiz erakutsiko zain.

 

Eta orduantxe agertuko zara,

etnografia museora bisitan.

Nire hondakinen bitrinaren paretik pasatzean

«As time goes by»

kantatuko duzu ahopeka.