AILITZ SOILIK SEXUA!

 

Etxera itzultzeko autobusera igo,

jendetzaren artean oreka ez galdu eta

sexuan pentsatzen ari naiz.

Jatetxe garesti batera joan,

otarrainskak plantxan eskatu eta

sexuan pentsatzen ari naiz.

Gimnasio baten paretik pasa,

gortinen atzetik barrurantz begiratu eta

sexuan pentsatzen ari naiz.

David Bowie, Iggy Pop, Doctor Deseo,

Andres Calamaro, Juan Carlos Perez eta

sexuan pentsatzen ari naiz.

Garbiketa egitean «Pronto»a

mahaiaren kontra igurtzi eta

sexuan pentsatzen ari naiz.

Unibertsitateetako liburutegiak,

elizetako konfesionarioak eta

sexuan pentsatzen ari naiz.

Txokolatea, esnegaina, zainzuriak,

kereixak, izozkiak, eztia eta

sexuan pentsatzen ari naiz.

Atari ilun zaharrak,

diskoteketako neoizko komunak eta

sexuan pentsatzen ari naiz.

Zugaz nagoenean...

ailitz soilik sexua

pentsatzen dudana!