Sagarroiak
Sonia Gonzalez

Euskaltzaindia / BBK, 2002

 

 

ASTELEHEN URDIN HONETAN

 

             «Izar betaurrekodunak gezurrak

             hilkutxan lurperatzen dituztenak

             eta gero, ur garbia edanik,

             etxera dihoaz

             bibolina haustera»

                                                    Itoiz

 

             «Zeru urdinaren antzerako

             astelehen urdin honetan

             ez dago kotxean ibiltzea bezalakorik...

             Ez al duzu Pakistan aldera

             kafe bat hartzera joateko gogorik?»

                                                Harkaitz Cano

 

             «Begibistakoa den arren, denok ikusten dugun

             zeru urdin hori azken finean ez da ez zerua ez urdina»

                                                            Joseba Sarrionandia

 

 

78tik nork ez, du astelehen urdinen bat izan?

Umeak ginen orduan baina

astelehenak eta urdinak amaitezinak direnez,

itxaron egin ziguten.

 

Astelehen guztiak ez datoz baina

                                   urdin berberaz jantzita.

 

Errepideen beldur naiz eta,

oinez abiatuz gero,

eguzkiak min egiten die begiei,

izar oro izkutatuta bere argiaren pean

astelehen zenbaitzuetan.

Mendi-martxak

baso batean dautza hipotekaturik,

harkaitz-baso edo

              Ron-baso batean,

astelehen urdin zenbaitzuetan.

Leku guztietatik topatu arren,

ez da bibolin zatirik ageri,

astelehen urdin eta luze zenbaitzuetan.

Ostiralak larunbat aurreko itxaronaldiak,

igandeak larunbat osteko nekeak

astelehenak nekeen eta itxaronaldien arteko

zerbait ulertezina

bihurtu dira,

itxuraldatzen eta desdefinitzen noiz hasi ziren

jakin barik,

euren orduen erlojua topatu ezinik.

 

Baina zure gonbidapena onartuko dut,

eta Pakistan aldera oinez

izan behar bada, oinez

astiro, presa barik, abiatuko naiz

ea oraindik kafe horrek azafrai

eta paprika usaineko kale kantoiren batean

itxaroten ote nauen,

presa barik,

milaka astelehen urdin bait dauzkat

aurretik,

78tik nire zain galdu ziren beste

bai

behintzat.

 

Sagarroiak
Sonia Gonzalez

Euskaltzaindia / BBK, 2002