BAKARDADEA

 

Bakarrik ibiltzen diren estartak

gatzezko basamortuak baino ez dira

hanka-arrastoetako zauriak

osatuko dizkizunik ez dagoenean.

 

Norberaren helbidea koloretako gutunetan

idatzi eta norberari igorri diezaiokegu,

baina buzoia propagandaz eta fakturaz beteta

aurkituko dugu gauero.

 

Ireki kaleko atea eta hara hor

                                  Andozeko Ibarra

lar luzea bidaiderik, gogaiderik gabe

zeharkatzeko,

lar luzea amaieran etsairik ere

ez duzula zain jakitean.

 

Bakardadea bizitzaren imitazioa da,

batzuetan zakar

beste batzuetan trebeziaz eta fin

oratzen den bizitzaren imitazioa,

denbora eta indar galera hutsa:

bakardadearen espektakulorako antzokian

ez dago txalo egingo duen

                                 ikus-entzulerik.