EURIA ETA MEDUSAK

 

Euriak hiria erasotzen du, fin eta ikusgabe.

Bustiz goaz kale bustiagoetan zehar,

ur tantei haragizko hilobi duina

eskeinita.

6. mailako liburuak zioen

ura garela ehuneko 60n edo 70en;

ez gero %90en!

ezen medusak ginateke

eta azal garden-transperentea genuke...

eta gu gizaki opakoak gara.

                                                                 Argi dago.

 

Gure gorputzaren ahaide urruna den

euri-jasarantz irteten dugu hirira

ahalik eta tanta gehien iragazteko

gorputz barrena,

ur ehunekoa handituko dugulakoan.

 

Ezen %90 ur bagina

medusak ginateke

eta ez genuke modurik

isilpeko sekretu izkuturik gordetzeko.