KRUPSKAIA

 

Aramuek habi egiten dute

etxeko izkinetan,

han non lehen mundua

salbatu nahi zuten berbak

ereiten zenituen,

baldosa, lapiko, arropa,

eguneroko gauza txikien artean.

Teoria igokariak lore potoetan gora,

ureztatu eta elikatu genituen

jendartea, boterea, agintea,

baldosa, lapiko, arropa

garbitu eta lisatu genituen.

Lurra diptero borobil erraldoia dela

jakinarazi zenidan egunean,

inoiz izan ei nuen xalotasuna ostu

eta begi zaharrez hegiratzera

kondenatu ninduzun.

Horixe zure irakaspen handiena.

Hala ere,

liburu gorririk idazteko denbora

nahikorik ez genuen izan, nonbait.

 

Zelan bizi naizen harrezkero jakin nahi baduzu

esango dizut

jadanik ez dudala hautsa kentzen,

ez dudala eskobatzen, ez dudala harrikoa egiten,

neure narrua ere ez dudala garbitzen,

hautsaren, aramuen eta diptero erraldoien

hazkurera ohitu nahi dudala,

                 «EZ NAIZ ZURE KRUPSKAIA IZANGO!»

ahoskatzera behartu ninduen

masokismo ulertezinera

ohitu nintzen bezala.