Noizteinka
Itxaro Borda
Maiatz, Uhargi 49, 2007ko urria

PATMOS DREAM

        Mila hostoekiko

Eukaliptusaren itzalean,

        Itsas bazterrean,

        Arrantzale etxola bat

                Bada Patmosen:

Ertzetik ibiltzen natzaio.

Ahoska ezinezko zorionez

        Ernaltzen zait bihotza

        Eta esker-hitzak

Gaueko ereinotz usainean

Txertatzen ditut.

Soberakinez mukuru

        Daukadan hiztegiak

Arrantzale etxolaren pobrezia

                Betearekin

        Kontrestatzen du,

Eta isiltasuna, nigan hunkigai,

Haizeari, ekiari, urari, lurrari

        Eta

Arrantzale etxola hortan

Bizitza bukatzeko dudan

        Ametsari

Aintza kantaz aldatzen da.

Ertzetik ibiltzen natzaio

Patmosen.

Noizteinka
Itxaro Borda
Maiatz, Uhargi 49, 2007ko urria