|
Noizteinka ARESTIREN BIHOTZAK Itsasoari beha, begi zola hitsa, Olerkaria dela aspalditik zendu, Ikusten du uhina eta uren bitsa, Biharko likitsa: Arestiren bihotzak Negar egiten du. Bilbao zakarretik, urratsean ero Poetagaia baita kostara zuzendu, Barnea erre zaio, eta dabil gero Burdin ibai bero: Arestiren bihotzak Negar egiten du. Ekaitzatik landako belar lehortua Esku ikaratiaz du soinetik kendu Eta berriz asmatu bizi agortua, Utziaz lortua: Arestiren bihotzak Negar egiten du. Maitasuna apal da, marea bezala: Musuaren eztia zelatan mantendu? Iluna datorrela, lurrak har dezala, Behar du gezala. Arestiren bihotzak Negar egiten du. Beldurra hedatu da orenen noizean, Harrizko Herriaren hatsanka gailendu. Arrotz altxatzen gara ohe bikoitzean, Izuen goizean: Arestiren bihotzak Negar egiten du.
Noizteinka |