Noizteinka
Itxaro Borda
Maiatz, Uhargi 49, 2007ko urria

MAULEKO AZKENA

Eta azken aldikoz

Neure adiskidea,

Halabehar ondikoz

Eraman dut bidea

Lurralde mutuan,

Ekain damutuan.

Eta azken bihotza

Euri soilen herrian,

Bilakatu da hotza

Belar busti berrian:

Gau etsia balitz

Sokorri eta hitz?

Eta azken kahaka

Joan zait hegalez

Haizearen balaka

Dastatu beharrez!

Oi ene mundua

Beti urrundua...

Eta azken hiriak

Zeharkaturik goiz,

Sartu zaizkit irriak

Erranez bi otoitz:

Doluak narama

Bidez bide ama!

Eta azken begiak

Itsutzen gainetan

Gauaren lau hegiak

Dabiltza zainetan:

Ez dakit zer naizen

Bide hori baizen.

Noizteinka
Itxaro Borda
Maiatz, Uhargi 49, 2007ko urria