Noizteinka
Itxaro Borda
Maiatz, Uhargi 49, 2007ko urria

BIDAIETAN

Beti izan nahi nuke

Nola naizen bidaietan,

Behin galtzearen truke

Mutu tristura gaietan

Eta libre zelaietan.

Beti nahi nuke izan

Goizaldeko xirrimirri,

Laino zuriaren gisan

Maitasun ohe mutirri,

Isiltasun eta irri.

Beti nuke izan nahi

Leiho bihozti zabala,

Eztitasun bete nagi

Eta gogotik jabala,

Harria bezain apala.

Izan nahi nuke beti

Hego airearen pare,

Buhatzaile herabeti,

Musu ebatsien zare

Eta gaueko landare.

Noizteinka
Itxaro Borda
Maiatz, Uhargi 49, 2007ko urria