Noizteinka
Itxaro Borda
Maiatz, Uhargi 49, 2007ko urria

Harria, lorea bezain arros,

Behatz pean latz dabil

Bizitzaren antzera.

Ilargi beteko gauetan

Azaleko mika ezpalak

Zilar bihurtzen zaizkio:

Harria, lorea bezain arros,

Esku ahurrean datxikat

Zure hatsaren lurrina

Balitza bezala.

Ez dakit zer den zoriona,

Eta agian ez dut jakin nahi ere,

Ez dakit zer den zoriona

Baina haizea, agurra, euria, musua,

Urratsa, errautsa eta argi-aurka

Zorion deituko nituzke

Ausartzen banintz.

Maite zaitut

Nor zaren asmatu gabe.

Golde.

Maite zaitut

Nor naizen oraindik

Ikasi gabe.

Uholde.

Noizteinka
Itxaro Borda
Maiatz, Uhargi 49, 2007ko urria