Isilka misilka
Jakes Ahamendaburu
Maiatz, Uhargi 14, 1988ko abendua

NEURE BLUES IHESKORREAN...

ALTZUko baso ilunpetikan

irten ilargiko su-haziak

motelki nituen zihikatu

gailen daitezen su-gar mihiak

justizi izar galduen askan

etsi etsian nuen ufatu...

Asetiak gosetiari

gari azi bekarzkio

maitasunak gorrotoari

laztan sorgi bekarzkio

                    ... etsi etsian nuen ufatu

Itxaroa etsipenari

oihal xuriz berraio

gaur ortzadarra galernari

urre jauntziz berraio

                    ... etsi etsian nuen ufatu

Urteak geroago

adimendukiago

giza matxista konformismoaz gogaiturikan

erlisio dogmakeri ritoez aserikan

nekatuta bainintzen geratu

ilargiko su-haziak nehoiz

ez ziren su-gar mihi edonoiz

gau eternoan bestelakatu...

Hango arratsalde euritsu hilean

ilargiak jaurtiki ke urasean

itxaro ortzadarra, gari laztana

nekuskien utopian erdi bana...

eta,

ni ordutik hara

arnas ezertara

                    ... etsi etsian nitzen hatsangotu...

Isilka misilka
Jakes Ahamendaburu
Maiatz, Uhargi 14, 1988ko abendua