AMODIOA ZER DAN

        Idazkera, izkera ta eraikera, Iztuetarenak.

        1

Amodioa zer dan

azaltzeko ongi,

kanta berri eder bat

jarzera noa ni:

munduak jakitea

guztiz da konbeni

nola bizitu diran

txatxantxo gozo bi.

        2

Badakigu dala txit

gozo ta eztia

enamoratutako

gazteen bizia:

duda bage da oen

atsegin guztia,

eraz eta sarriro

alkar ikustia.

        3

Biotz bi unituak

maitaro alkarri,

laztandurik betiko

oi dirade jarri:

atsegin andietan

guztiz arrigarri,

itz goixoak esanaz

batak besteari.

        4

Aditutzean batak,

bestearen itza,

bien biotzak pozez

pill pill pill dabiltza:

eztitan oi dabillen

euliaren gisa,

zeñek gozatutzen du

onelako ditxa?

        5

Zoriontasun andi

gozo onen jabe,

Gipuzkoa onetan

bi gazte ba daude,

elizaz unituak

gustora alere,

iñork prenda artzeko

beldurrikan bage.

        6

Goqoratu zait neri

garbi esatea,

amanteak nor diran

bata ta bestea:

zarauztar Don Juan Jose

Alzuru gaztea,

ta Doña Mariana

bere emaztea.

        7

Txatxantxo maitati au

dalako alaia,

beti beti izanda

guztiz askok naia:

batetik ederra da

bestetik ernaia,

ezta erraz billatzen

onelako gaia!

        8

Aitortu bear bada,

garbiro egia,

dama polita da ta

guztiz egokia:

goiz aski bota zion

Alzuruk begia,

artu ere bai ongi

goruntzen neurria.

        9

Amasei urterekin

txit gain gañekoa,

Doña Mariana zan

guri sasoikoa:

begia txir txir, eta

alegre gogoa,

nork maitatuko ez du

ziñez alakoa?

        10

Milla zortzi-eun ogei

ta bederatzian,

txatxantxo goixo oek

laztandu zirean

pena asko pasarik

bai zazpi urtean

ezkondurik daude gaur

pozkida betean.

        11

Amante oek nola

izan diran bizi

ikusi bage ezin

lezake sinitsi

Alkarganatu naita

iñok ez nai utzi

egun gozo au nekez

bait dute iritsi.

        12

Naitasun geiegia

izanik alkarri

ikusi dute zenbait

estura ta larri

baita igaro ere

pena arrigarri

ezkondurik gustora

diran arte jarri.

        13

Ezkontzeko denpora

danean iritsi

ez dute bada izan

atsekabe gutxi

Azpeitian egon ta

apartean bizi

nai arren ezin alkar

gustora ikusi.

        14

Berronkalkoan bata

Ibiron bestea

poz andia zuten txit

alkar ikustea

eguna alegre ta

gaua txit tristea

gogoratu zitzaien

argiak piztea.

        15

Gauaz eta egunaz

alkarri begira

loaz oroitu bage

ernai egon dira

au izan da txatxantxo

goixo oen ira [jira?]

plazan ibilli arren

zezenen korrira.

        16

Abuztuko illaren

bigarren eguna

amante oentzako

etzan txit illuna

orduan izan dute

guztizko fortuna

Jaungoikoak diela

beti osasuna.