IGARLEA

Adar bat mugitu da

baina munduak espero zuen txoria ez dago,

lainoak etorri dira

baina lurrak desira duen euririk ez du egin,

euli bat jausi da

baina lakuak izkutatzen duen arraina ez da azaleratu.

Honela itxaroten zaitut nik

era guztietako kalkuluak eginez.

Musika entzuten da

baina areto hutsean ez dago dantzaririk,

lurrin gozo bat dabil

baina sagarrondoak ez daude loran,

emakumeekin oheratu naiz

baina bihotzak gordetzen duen irudia ez da desegin.

Honela itxaroten zaitut nik

era guztietako seinaleetan bilatuz.